KHun se gundha miTTi ko aur aadam ko tamir kiya

ḳhuun se gūñdhā miTTī ko aur aadam ko ta.amīr kiyā

uupar vaale ne bhī apne ḳhvāboñ ko ta.abīr kiyā

tanhā.ī ke saaz pe chheḌe saare dard sadāoñ ke

vahshat ke āñchal se lipTe aur use zanjīr kiyā

jis lahje ko bhī jhuThlāyā haath meñ us ke ḳhaak lagī

jis abrū tak haath baḌhāyā ham ne us ko tiir kiyā

upar jaane vaale raste pastī ke mohtāj kiye

ham jis ke qadmoñ meñ baiThe us ko hī jāgīr kiyā

merā chehra dekhne vaalo paḌhnā bhī to sīkho nā

kitne mushkil mausam kaaTe aur un ko tafsīr kiyā

apnā ronā rone vaale tū kis khet kī muulī hai

ishq ne tujh se pahle jaane kitnoñ ko rāhgīr kiyā

KHun se gundha miTTi ko aur aadam ko tamir kiya

upar wale ne bhi apne KHwabon ko tabir kiya

tanhai ke saz pe chheDe sare dard sadaon ke

wahshat ke aanchal se lipTe aur use zanjir kiya

jis lahje ko bhi jhuThlaya hath mein us ke KHak lagi

jis abru tak hath baDhaya hum ne us ko tir kiya

upar jaane wale raste pasti ke mohtaj kiye

hum jis ke qadmon mein baiThe us ko hi jagir kiya

mera chehra dekhne walo paDhna bhi to sikho na

kitne mushkil mausam kaTe aur un ko tafsir kiya

apna rona rone wale tu kis khet ki muli hai

ishq ne tujh se pahle jaane kitnon ko rahgir kiya