KHun se likhta hai tawiz-e-ajal kaghaz par

ḳhuun se likhtā hai ta.avīz-e-ajal kāġhaz par

vaqt kartā hai ajab siflī amal kāġhaz par

ranj miTne kā nahīñ phir bhī tasallī ke liye

misrā-e-dard kī tartīb badal kāġhaz par

ye taḳhayyul hai ki umDā huā dariyā koī

mauja-e-āb-e-ravāñ hai ki ġhazal kāġhaz par

kitne jazbe tirī be-rāh-ravī ne kuchle

harf-e-āvāra zarā dekh ke chal kāġhaz par

khetiyāñ kyā kyā ugātā huuñ sar-e-dasht-e-ḳhayāl

lahlahātā hai koī phuul na phal kāġhaz par

lafz jab aa ke chamaktā hai sar-e-nok-e-qalam

raushnī detā hai mahtāb-e-azal kāġhaz par

jab kabhī chāhā likhūñ jhiil tirī āñkhoñ ko

tairne lagte haiñ ḳhushbū ke kañval kāġhaz par

ek tasvīr banā kar maiñ tire hoñToñ kī

sabt kar dūñgā kisī yaad ke pal kāġhaz par

titliyāñ aane lagīñ pursa-e-ġham kī ḳhātir

tujh se ye kis ne kahā phuul masal kāġhaz par

raushnā.ī ko hama-gīr ujāle meñ badal

apnī fitrat kī siyāhī tū na mal kāġhaz par

aur kuchh der meñ ye rang nikālegī ka.ī

ye jo bikhrī sī hai nau-ḳhez ġhazal kāġhaz par

KHun se likhta hai tawiz-e-ajal kaghaz par

waqt karta hai ajab sifli amal kaghaz par

ranj miTne ka nahin phir bhi tasalli ke liye

misra-e-dard ki tartib badal kaghaz par

ye taKHayyul hai ki umDa hua dariya koi

mauja-e-ab-e-rawan hai ki ghazal kaghaz par

kitne jazbe teri be-rah-rawi ne kuchle

harf-e-awara zara dekh ke chal kaghaz par

khetiyan kya kya ugata hun sar-e-dasht-e-KHayal

lahlahata hai koi phul na phal kaghaz par

lafz jab aa ke chamakta hai sar-e-nok-e-qalam

raushni deta hai mahtab-e-azal kaghaz par

jab kabhi chaha likhun jhil teri aankhon ko

tairne lagte hain KHushbu ke kanwal kaghaz par

ek taswir bana kar main tere honTon ki

sabt kar dunga kisi yaad ke pal kaghaz par

titliyan aane lagin pursa-e-gham ki KHatir

tujh se ye kis ne kaha phul masal kaghaz par

raushnai ko hama-gir ujale mein badal

apni fitrat ki siyahi tu na mal kaghaz par

aur kuchh der mein ye rang nikalegi kai

ye jo bikhri si hai nau-KHez ghazal kaghaz par