KHun wirasat ka ragon mein faKHr ke qabil hua

ḳhuuñ virāsat kā ragoñ meñ faḳhr ke qābil huā

jab mire hī ḳhāk-dāñ se merā sar hāsil huā

har jazīra barf kā merī anā kī mumlikat

raah meñ phir koh-e-nā-mālūm kyuuñ haa.il huā

ret ke dariyā se qaa.em thī ummīd mo.ajiza

tishnagī meñ jo qadam aage baḌhā hāsil huā

saaya paanī meñ chalā jab mujh ko tanhā chhoḌ kar

merā manzar hī mire ehsās kā qātil huā

phir havā kī muTThiyoñ se ret barsī sahn meñ

phir bikharne kā nazar ko zā.iqa hāsil huā

tum anā ke zo.am meñ inkār-e-fan karte to ho

aur agar is ahd kā maiñ hī had-e-fāsil huā

KHun wirasat ka ragon mein faKHr ke qabil hua

jab mere hi KHak-dan se mera sar hasil hua

har jazira barf ka meri ana ki mumlikat

rah mein phir koh-e-na-malum kyun hail hua

ret ke dariya se qaem thi ummid moajiza

tishnagi mein jo qadam aage baDha hasil hua

saya pani mein chala jab mujh ko tanha chhoD kar

mera manzar hi mere ehsas ka qatil hua

phir hawa ki muTThiyon se ret barsi sahn mein

phir bikharne ka nazar ko zaiqa hasil hua

tum ana ke zoam mein inkar-e-fan karte to ho

aur agar is ahd ka main hi had-e-fasil hua