KHwab aankhon ke ye be-jaan kahan hote hain

ḳhvāb āñkhoñ ke ye be-jān kahāñ hote haiñ

rāste sabr ke āsān kahāñ hote haiñ

jo ga.e aap to tanhā.ī yahāñ rahne lagī

ki nagar dil ke ye vīrān kahāñ hote haiñ

koī mar jaa.e sisaktā rahe dam bhartā rahe

hañsne vaale ye pareshān kahāñ hote haiñ

dard to shor machātā hai akele man meñ

dil ke dālān bhī sunsān kahāñ hote haiñ

koī qātil bhī agar taḳht pe qabza kar le

log kam-zarf ye hairān kahāñ hote haiñ

nā-ḳhudāoñ ne sañbhālī hai ye duniyā jab se

DhūñDhtī phirtī huuñ bhagvān kahāñ hote haiñ

chaltī phirtī huī be-jān mashīneñ haiñ ye sab

vo jo insān the insān kahāñ hote haiñ

ye ba-juz dostoñ ke aur atā kis kī hai

nā-tavāñ varna ye paimān kahāñ hote haiñ

ġham kī shiddat mujhe rone nahīñ detī kyūñki

ranj-o-ġham dard ke ehsān kahāñ hote haiñ

dil ko samjhā liyā kahte hue 'fahmī' itnā

puure ho jaa.eñ vo armān kahāñ hote haiñ

KHwab aankhon ke ye be-jaan kahan hote hain

raste sabr ke aasan kahan hote hain

jo gae aap to tanhai yahan rahne lagi

ki nagar dil ke ye viran kahan hote hain

koi mar jae sisakta rahe dam bharta rahe

hansne wale ye pareshan kahan hote hain

dard to shor machata hai akele man mein

dil ke dalan bhi sunsan kahan hote hain

koi qatil bhi agar taKHt pe qabza kar le

log kam-zarf ye hairan kahan hote hain

na-KHudaon ne sanbhaali hai ye duniya jab se

DhunDhti phirti hun bhagwan kahan hote hain

chalti phirti hui be-jaan mashinen hain ye sab

wo jo insan the insan kahan hote hain

ye ba-juz doston ke aur ata kis ki hai

na-tawan warna ye paiman kahan hote hain

gham ki shiddat mujhe rone nahin deti kyunki

ranj-o-gham dard ke ehsan kahan hote hain

dil ko samjha liya kahte hue 'fahmi' itna

pure ho jaen wo arman kahan hote hain