خواب آنکھوں میں محبت کا بسائے رکھوں

خواب آنکھوں میں محبت کا بسائے رکھوں

دل یہ کہتا ہے کہ یہ شمع جلائے رکھوں

کچھ نہ کچھ روز بگڑ جاتا ہے میرے گھر میں

کب تک اس قصر شرافت کو بچائے رکھوں

ان کی خواہش ہے کہ رشتوں میں لطافت نہ رہے

میری کوشش ہے کہ سینے سے لگائے رکھوں

ایک اک کر کے بجھے جاتے ہیں ارماں کے چراغ

آئنہ خانۂ دل کیسے سجائے رکھوں

دل تو کھینچے لیے جاتا ہے سر کوئے وفا

کیسے اس راہ سے میں خود کو بچائے رکھوں

یاد تیری تن قرطاس میں ڈھل جائے اگر

اس صحیفے کو میں پھولوں میں بسائے رکھوں