KHwab aisa bhi nazar aaya hai aksar mujhko

ḳhvāb aisā bhī nazar aayā hai aksar mujh ko

lagā jibrīl kā shahpar mirā bistar mujh ko

apne maqsad ke liye lafz banā kar mujh ko

koī dauḌātā hai kāġhaz kī saḌak par mujh ko

Das na le dekho kahīñ dhuup kā manzar mujh ko

tum ne bhejā to hai bal khātī saḌak par mujh ko

sab ko maiñ un kī kitāboñ meñ nazar aatā huuñ

log paḌhte haiñ tire shahr meñ ghar ghar mujh ko

kyuuñ na ghabrā.ūñ ki tanhā huuñ ghanā hai jangal

duur se dekhe hai sannāTe kā lashkar mujh ko

kyuuñ na sahrā ko nichoḌūñ ki mirī pyaas bujhe

degā ik qatra na kanjūs samundar mujh ko

niiñd jab tak thī mirī āñkhoñ meñ mahfūz thā maiñ

qatl lamhoñ ne kiyā ḳhvāb se bāhar mujh ko

merī āñkhoñ ke dahakte hue sho.ale pa na jā

sard kitnā huuñ samajh haath se chhū kar mujh ko

vo pighaltā hai ki 'shāriq' mirā tan jaltā hai

dekhe rakh kar koī sūraj ke barābar mujh ko

KHwab aisa bhi nazar aaya hai aksar mujh ko

laga jibril ka shahpar mera bistar mujh ko

apne maqsad ke liye lafz bana kar mujh ko

koi dauData hai kaghaz ki saDak par mujh ko

Das na le dekho kahin dhup ka manzar mujh ko

tum ne bheja to hai bal khati saDak par mujh ko

sab ko main un ki kitabon mein nazar aata hun

log paDhte hain tere shahr mein ghar ghar mujh ko

kyun na ghabraun ki tanha hun ghana hai jangal

dur se dekhe hai sannaTe ka lashkar mujh ko

kyun na sahra ko nichoDun ki meri pyas bujhe

dega ek qatra na kanjus samundar mujh ko

nind jab tak thi meri aankhon mein mahfuz tha main

qatl lamhon ne kiya KHwab se bahar mujh ko

meri aankhon ke dahakte hue shoale pa na ja

sard kitna hun samajh hath se chhu kar mujh ko

wo pighalta hai ki 'shaariq' mera tan jalta hai

dekhe rakh kar koi suraj ke barabar mujh ko