KHwab apne meri aankhon ke hawale kar ke

ḳhvāb apne mirī āñkhoñ ke havāle kar ke

tū kahāñ hai mujhe nīñdoñ ke havāle kar ke

merā āñgan to ba-juz tere mahaktā hī nahīñ!

bārhā dekhā hai phūloñ ke havāle kar ke

ek gumnām jazīre meñ utar jā.ūñgā

apnī kashtī kabhī lahroñ ke havāle kar ke

kaisā sūraj thā ki phir lauT ke aayā hī nahīñ

chāñd taare mirī rātoñ ke havāle kar ke

mujh ko mā'lūm thā ik roz chalā jā.egā!

vo mirī 'umr ko yādoñ ke havāle kar ke

ghar kī vīrānī badal Daalī hai raunaq meñ 'hasan'

sahn kā peḌ parindoñ ke havāle kar ke

KHwab apne meri aankhon ke hawale kar ke

tu kahan hai mujhe nindon ke hawale kar ke

mera aangan to ba-juz tere mahakta hi nahin!

barha dekha hai phulon ke hawale kar ke

ek gumnam jazire mein utar jaunga

apni kashti kabhi lahron ke hawale kar ke

kaisa suraj tha ki phir lauT ke aaya hi nahin

chand tare meri raaton ke hawale kar ke

mujh ko ma'lum tha ek roz chala jaega!

wo meri 'umr ko yaadon ke hawale kar ke

ghar ki virani badal Dali hai raunaq mein 'hasan'

sahn ka peD parindon ke hawale kar ke