KHwab-e-sahar ka dekhne wala to main bhi hun

ḳhvāb-e-sahar kā dekhne vaalā to maiñ bhī huuñ

sūraj nahīñ huuñ shaam kā taarā to maiñ bhī huuñ

yūsuf ko dekhtā huuñ maiñ chashm-e-zuleḳhā se

gauhar nahīñ guhar kā shanāsā to maiñ bhī huuñ

dariyā ke saath chalnā gavārā nahīñ mujhe

bahtā huuñ apnī rau meñ ki dhārā to maiñ bhī huuñ

dekhā nahīñ kisī ne bhī merī taraf magar

āñkhoñ kī rāhguzār se guzrā to maiñ bhī huuñ

dariyā ko maiñ bhī dariyā samajhtā huuñ dosto

Duubā agar nahīñ huuñ safīna to maiñ bhī huuñ

vahshat mire sipurd bhī kar mujh se bhī to mil

sahrā nahīñ huuñ ret kā zarra to maiñ bhī huuñ

KHwab-e-sahar ka dekhne wala to main bhi hun

suraj nahin hun sham ka tara to main bhi hun

yusuf ko dekhta hun main chashm-e-zuleKHa se

gauhar nahin guhar ka shanasa to main bhi hun

dariya ke sath chalna gawara nahin mujhe

bahta hun apni rau mein ki dhaara to main bhi hun

dekha nahin kisi ne bhi meri taraf magar

aankhon ki rahguzar se guzra to main bhi hun

dariya ko main bhi dariya samajhta hun dosto

Duba agar nahin hun safina to main bhi hun

wahshat mere sipurd bhi kar mujh se bhi to mil

sahra nahin hun ret ka zarra to main bhi hun