KHwab-e-shab-e-pur-kaif ki tabir to dega

ḳhvāb-e-shab-e-pur-kaif kī ta.abīr to degā

kuchh aur nahīñ apnī vo tasvīr to degā

jaate hue yak baar palaT kar mirī jānib

vo merī mulāqāt ko tauqīr to degā

añgḌā.iyoñ ke saath vo gesū kā nazāra

zulfoñ kī mire paañv meñ zanjīr to degā

maqsūd use qatl hai to dekhnā ik din

hāthoñ meñ mire dost ke shamshīr to degā

kho jaa.e na zulmat meñ kahīñ ziist ye merī

vo rāh-e-vafā meñ mujhe tanvīr to degā

inkār-e-mohabbat pe bhī 'rahbar' ko yaqīñ hai

vo an-kahī har baat kī tafsīr to degā

KHwab-e-shab-e-pur-kaif ki tabir to dega

kuchh aur nahin apni wo taswir to dega

jate hue yak bar palaT kar meri jaanib

wo meri mulaqat ko tauqir to dega

angDaiyon ke sath wo gesu ka nazara

zulfon ki mere panw mein zanjir to dega

maqsud use qatl hai to dekhna ek din

hathon mein mere dost ke shamshir to dega

kho jae na zulmat mein kahin zist ye meri

wo rah-e-wafa mein mujhe tanwir to dega

inkar-e-mohabbat pe bhi 'rahbar' ko yaqin hai

wo an-kahi har baat ki tafsir to dega