KHwab-e-ulfat bhi haqiqat ka nishan puchhta hai

ḳhvāb-e-ulfat bhī haqīqat kā nishāñ pūchhtā hai

ab mirā dost mirī jaañ kī amaañ pūchhtā hai

dil hai be-mehr ki is ālam-e-tanhā.ī meñ

duur nafrat se mohabbat kī zabāñ pūchhtā hai

dukh to ye hai ki tire shahr meñ āvāra-chalan

qātil-e-uns bhī phūloñ kī dukāñ pūchhtā hai

'aql to 'aql thī ab bār-e-junūñ meñ sho'la

be-karāñ ho ke mire dil kā makāñ pūchhtā hai

mausam-e-gul hai magar ġham se pareshāñ taa.ir

sūd-e-bīnā.ī meñ ik kār-e-ziyāñ pūchhtā hai

ab bhalā koī nibhā.e to nibhā.e kaise

ab ta'alluq bhī nibhāne ko ye jaañ pūchhtā hai

tum kaho kaise raqam koī suḳhan ho 'kāvish'

bāġh-e-dil jab ki bahāroñ meñ ḳhizāñ pūchhtā hai

KHwab-e-ulfat bhi haqiqat ka nishan puchhta hai

ab mera dost meri jaan ki aman puchhta hai

dil hai be-mehr ki is aalam-e-tanhai mein

dur nafrat se mohabbat ki zaban puchhta hai

dukh to ye hai ki tere shahr mein aawara-chalan

qatil-e-uns bhi phulon ki dukan puchhta hai

'aql to 'aql thi ab bar-e-junun mein sho'la

be-karan ho ke mere dil ka makan puchhta hai

mausam-e-gul hai magar gham se pareshan tair

sud-e-binai mein ek kar-e-ziyan puchhta hai

ab bhala koi nibhae to nibhae kaise

ab ta'alluq bhi nibhane ko ye jaan puchhta hai

tum kaho kaise raqam koi suKHan ho 'kawish'

bagh-e-dil jab ki bahaaron mein KHizan puchhta hai