خواب الفت بھی حقیقت کا نشاں پوچھتا ہے

خواب الفت بھی حقیقت کا نشاں پوچھتا ہے

اب مرا دوست مری جاں کی اماں پوچھتا ہے

دل ہے بے مہر کہ اس عالم تنہائی میں

دور نفرت سے محبت کی زباں پوچھتا ہے

دکھ تو یہ ہے کہ ترے شہر میں آوارہ چلن

قاتل انس بھی پھولوں کی دکاں پوچھتا ہے

عقل تو عقل تھی اب بار جنوں میں شعلہ

بے کراں ہو کے مرے دل کا مکاں پوچھتا ہے

موسم گل ہے مگر غم سے پریشاں طائر

سود بینائی میں اک کار زیاں پوچھتا ہے

اب بھلا کوئی نبھائے تو نبھائے کیسے

اب تعلق بھی نبھانے کو یہ جاں پوچھتا ہے

تم کہو کیسے رقم کوئی سخن ہو کاوشؔ

باغ دل جب کہ بہاروں میں خزاں پوچھتا ہے