KHwab hain sare nae aankh purani meri

ḳhvāb haiñ saare na.e aañkh purānī merī

hai tazādāt se bharpūr kahānī merī

tujh se maiñ kahtā na thā andhī havā se bachnā

sun ke bhī ek yahī baat na maanī merī

khā gayā karb-e-zamāna mire lahje kā vaqār

aam thī varna yahāñ sho.ala-bayānī merī

ufuq-e-dil pe ye bujhtā huā rangoñ kā hujūm

māñgtā rahtā mujhī se hai nishānī merī

din kā har zaḳhm maiñ rātoñ ko ginā kartā huuñ

din hai be-kaif mirā raat suhānī merī

mīThe chashmoñ se jo guzroge yaqīn hai mujh ko

yaad aa.egī bahut tishna-dahānī merī

phailnā hai mirī fitrat meñ ki huuñ mauja-e-gul

rā.egāñ jā.egī kab ḳhū-e-ravānī merī

KHwab hain sare nae aankh purani meri

hai tazadat se bharpur kahani meri

tujh se main kahta na tha andhi hawa se bachna

sun ke bhi ek yahi baat na mani meri

kha gaya karb-e-zamana mere lahje ka waqar

aam thi warna yahan shoala-bayani meri

ufuq-e-dil pe ye bujhta hua rangon ka hujum

mangta rahta mujhi se hai nishani meri

din ka har zaKHm main raaton ko gina karta hun

din hai be-kaif mera raat suhani meri

miThe chashmon se jo guzroge yaqin hai mujh ko

yaad aaegi bahut tishna-dahani meri

phailna hai meri fitrat mein ki hun mauja-e-gul

raegan jaegi kab KHu-e-rawani meri