KHwab ke pas hain tabir se wabasta hain

ḳhvāb ke paas haiñ ta.abīr se vābasta haiñ

phir bhī ye faisle taqdīr se vābasta haiñ

itnā dekhā hai use ham ne ki ab lagtā hai

saare chehre usī tasvīr se vābasta haiñ

ham ko ma.alūm hai milne se rahe un ke javāb

jo savāl aap kī tahrīr se vābasta haiñ

umr-bhar ham ko ise pahn ke chalnā hogā

ham ki is dard kī zanjīr se vābasta haiñ

us ko har vaqt dikhānī hai navābī apnī

aur ham mīr-taqī-'mīr' se vābasta haiñ

ye ajab daur hai is daur meñ dikhtī hī nahīñ

aisī buniyādeñ jo ta.amīr se vābasta haiñ

jo sadā phuul khilātā chale sab rastoñ meñ

ham bhī ik aise hī rah-gīr se vābasta haiñ

KHwab ke pas hain tabir se wabasta hain

phir bhi ye faisle taqdir se wabasta hain

itna dekha hai use hum ne ki ab lagta hai

sare chehre usi taswir se wabasta hain

hum ko malum hai milne se rahe un ke jawab

jo sawal aap ki tahrir se wabasta hain

umr-bhar hum ko ise pahn ke chalna hoga

hum ki is dard ki zanjir se wabasta hain

us ko har waqt dikhani hai nawabi apni

aur hum mir-taqi-'mir' se wabasta hain

ye ajab daur hai is daur mein dikhti hi nahin

aisi buniyaaden jo tamir se wabasta hain

jo sada phul khilata chale sab raston mein

hum bhi ek aise hi rah-gir se wabasta hain