KHwab ki kokh mein palte hue ro paDte hain

ḳhvāb kī kokh meñ palte hue ro paḌte haiñ

niiñd meñ pahlū badalte hue ro paḌte haiñ

mujh se chhup kar mere kāñdhoñ ke farishte aksar

ghar ke āñgan meñ Tahalte hue ro paḌte haiñ

ai parī-zād tirī yaad meñ baiThe ham log

haath ko haath se malte hue ro paḌte haiñ

roz ik yaad hameñ zaḳhm diyā kartī hai

roz ik yaad meñ jalte hue ro paḌte haiñ

sub.h kī god ke paale hue manzar aksar

hijr kī raat meñ Dhalte hue ro paḌte haiñ

dekh kar shahr kī galiyoñ ke manāzir ḳhūnīñ

shahr-e-āshob meñ chalte hue ro paḌte haiñ

itne mānūs haiñ ham kūcha-e-jānāñ se 'gumān'

ham tire ghar se nikalte hue ro paḌte haiñ

KHwab ki kokh mein palte hue ro paDte hain

nind mein pahlu badalte hue ro paDte hain

mujh se chhup kar mere kandhon ke farishte aksar

ghar ke aangan mein Tahalte hue ro paDte hain

ai pari-zad teri yaad mein baiThe hum log

hath ko hath se malte hue ro paDte hain

roz ek yaad hamein zaKHm diya karti hai

roz ek yaad mein jalte hue ro paDte hain

subh ki god ke pale hue manzar aksar

hijr ki raat mein Dhalte hue ro paDte hain

dekh kar shahr ki galiyon ke manazir KHunin

shahr-e-ashob mein chalte hue ro paDte hain

itne manus hain hum kucha-e-jaanan se 'guman'

hum tere ghar se nikalte hue ro paDte hain