KHwab likhkhun kabhi saya kabhi sahra likhkhun

ḳhvāb likhkhūñ kabhī saaya kabhī sahrā likhkhūñ

zindagī tū hī batā maiñ tujhe kyā kyā likhkhūñ

koī chehra to yahāñ phuul ke jaisā dekhūñ

koī lamha to kisī vaqt mahaktā likhkhūñ

dil ye kahtā hai kahīñ baiTh ke tanhā.ī meñ

vo kahe mujh se to maiñ us kā sarāpā likhkhūñ

tere qāmat ke tasavvur ko karūñ kyoñ mahdūd

tujh ko ḳhushbū kabhī shabnam kabhī sho.ala likhkhūñ

mohtasib qatl-gahoñ meñ abhī taaza hai lahū

kaise maiñ shahr-e-sitamgar kā qasīda likhkhūñ

ek sannāTā hai ta.abīr ke ā.īnoñ meñ

ḳhvāb āvāra haiñ likhkhūñ to unheñ kyā likhkhūñ

be-amāñ shahr kī rūdād sunā.ūñ kab tak

koī to sher ġhazal kā maiñ achhūtā likhkhūñ

pā-ba-zanjīr tujhe raqs meñ dekhā maiñ ne

kyoñ na ab shahr-e-ġhazālāñ kā qasīda likhkhūñ

koī to aa.e nazar ḳhūn-e-jigar kā lamha

ek misrā to kabhī 'mīr' ke jaisā likhkhūñ

KHwab likhkhun kabhi saya kabhi sahra likhkhun

zindagi tu hi bata main tujhe kya kya likhkhun

koi chehra to yahan phul ke jaisa dekhun

koi lamha to kisi waqt mahakta likhkhun

dil ye kahta hai kahin baiTh ke tanhai mein

wo kahe mujh se to main us ka sarapa likhkhun

tere qamat ke tasawwur ko karun kyon mahdud

tujh ko KHushbu kabhi shabnam kabhi shoala likhkhun

mohtasib qatl-gahon mein abhi taza hai lahu

kaise main shahr-e-sitamgar ka qasida likhkhun

ek sannaTa hai tabir ke aainon mein

KHwab aawara hain likhkhun to unhen kya likhkhun

be-aman shahr ki rudad sunaun kab tak

koi to sher ghazal ka main achhuta likhkhun

pa-ba-zanjir tujhe raqs mein dekha main ne

kyon na ab shahr-e-ghazalan ka qasida likhkhun

koi to aae nazar KHun-e-jigar ka lamha

ek misra to kabhi 'mir' ke jaisa likhkhun