KHwab mein nur barasne ka saman hota hai

ḳhvāb meñ nuur barasne kā samāñ hotā hai

aañkh khultī hai to kamre meñ dhuāñ hotā hai

dhuup aisī dar-o-dīvār pe Thahrī aa kar

ghar pe aaseb ke saa.e kā gumāñ hotā hai

ḳhvāb meñ jā ke use dekh to aa.uuñ lekin

ab vo āñkhoñ ke darīchoñ meñ kahāñ hotā hai

din ko hotī hai jo logoñ ke guzarne kī jagah

shaam ke ba.ad vahāñ merā makāñ hotā hai

ḳhauf an-jānā koī pīchhe paḌā hai aise

jis jagah jaatā huuñ kam-baḳht vahāñ hotā hai

yuuñ mire aage ubhar aatā hai vo shaḳhs 'hasan'

mere andar hī kahīñ jaise nihāñ hotā hai

KHwab mein nur barasne ka saman hota hai

aankh khulti hai to kamre mein dhuan hota hai

dhup aisi dar-o-diwar pe Thahri aa kar

ghar pe aaseb ke sae ka guman hota hai

KHwab mein ja ke use dekh to aaun lekin

ab wo aankhon ke darichon mein kahan hota hai

din ko hoti hai jo logon ke guzarne ki jagah

sham ke baad wahan mera makan hota hai

KHauf an-jaana koi pichhe paDa hai aise

jis jagah jata hun kam-baKHt wahan hota hai

yun mere aage ubhar aata hai wo shaKHs 'hasan'

mere andar hi kahin jaise nihan hota hai