KHwab-nagar ke shahzade ne aise bhi nirwan liya

ḳhvāb-nagar ke shahzāde ne aise bhī nirvān liyā

chāñd sajāyā āñkhoñ meñ aur raat ko sar par taan liyā

duniyā-dārī khel-tamāsha ishq-o-mohabbat rāhat-e-jāñ

aag meñ apnī jal kar ham ne ban bargad ye gyaan liyā

vo āñkheñ hī aisī thiiñ ham Duub ga.e anjāne meñ

jaan ke kis ne TūTī-phūTī kashtī meñ tūfān liyā

kaun sā pardā ham se thā tum dil kī bāteñ kah sakte the

muft meñ tum ne baat baḌhā.ī ġhairoñ kā ehsān liyā

hirs-o-havas kā daur hai is meñ bikte haiñ sab rishte-nāte

jaan pe apnī kyuuñ kar tum ne auroñ kā bohtān liyā

vāqif kab thā pyaar se pahle lekin 'zākir' pyaar ke ba.ad

qismat rekhā husn-o-adā aur nāz-o-jafā sab jaan liyā

KHwab-nagar ke shahzade ne aise bhi nirwan liya

chand sajaya aankhon mein aur raat ko sar par tan liya

duniya-dari khel-tamasha ishq-o-mohabbat rahat-e-jaan

aag mein apni jal kar hum ne ban bargad ye gyan liya

wo aankhen hi aisi thin hum Dub gae anjaane mein

jaan ke kis ne TuTi-phuTi kashti mein tufan liya

kaun sa parda hum se tha tum dil ki baaten kah sakte the

muft mein tum ne baat baDhai ghairon ka ehsan liya

hirs-o-hawas ka daur hai is mein bikte hain sab rishte-nate

jaan pe apni kyun kar tum ne auron ka bohtan liya

waqif kab tha pyar se pahle lekin 'zakir' pyar ke baad

qismat rekha husn-o-ada aur naz-o-jafa sab jaan liya