KHwab pahle le gaya phir rat-jaga bhi le gaya

ḳhvāb pahle le gayā phir rat-jagā bhī le gayā

jaate jaate vo mire ghar kā diyā bhī le gayā

dhuup hai ab aur na bādal hai na ḳhushbū aur na phuul

saare mausam le gayā āb-o-havā bhī le gayā

zindagī ai zindagī tai ho masāfat kis tarah

samt-e-manzil le gayā vo rāsta bhī le gayā

ek muddat ho ga.ī baiThā huuñ sañg-e-mīl par

rāstoñ ke saath apne naqsh-e-pā bhī le gayā

haath patthar ho ga.e lab kapkapāte rah ga.e

vo duā bhī le gayā dast-e-duā bhī le gayā

kaise dekhūñgā maiñ 'zulfī' apne chehre kī kitāb

vo gayā to aarzū kā aa.ina bhī le gayā

KHwab pahle le gaya phir rat-jaga bhi le gaya

jate jate wo mere ghar ka diya bhi le gaya

dhup hai ab aur na baadal hai na KHushbu aur na phul

sare mausam le gaya aab-o-hawa bhi le gaya

zindagi ai zindagi tai ho masafat kis tarah

samt-e-manzil le gaya wo rasta bhi le gaya

ek muddat ho gai baiTha hun sang-e-mil par

raston ke sath apne naqsh-e-pa bhi le gaya

hath patthar ho gae lab kapkapate rah gae

wo dua bhi le gaya dast-e-dua bhi le gaya

kaise dekhunga main 'zulfi' apne chehre ki kitab

wo gaya to aarzu ka aaina bhi le gaya