KHwab to dekh magar KHwab ki tabir na dekh

ḳhvāb to dekh magar ḳhvāb kī ta.abīr na dekh

kis tarah bantī bigaḌtī hai ye taqdīr na dekh

Dheh na jaa.e kahīñ ulfat kā tirī tāj-mahal

is kī buniyād ko dekh uuprī ta.amīr na dekh

maiñ ne jo kuchh bhī kiyā sab tirī shah pā ke kiyā

hashr ke roz faqat merī hī taqsīr na dekh

us ko paanā hai to phir toḌ de saare bandhan

raah meñ us kī kisī ko bhī anā-gīr na dekh

tujh sā zālim bhī na khā jaa.e taras dekh kahīñ

daam meñ apne taḌaptā huā naḳhchīr na dekh

khīñch abrū kī kamāñ aur chalā tiir pe tiir

kitne sīnoñ meñ haiñ paivast tire tiir na dekh

ek jhaTke kī to hai baat magar us kā ḳhayāl

mujh ko roke hai ki tū jānib-e-zanjīr na dekh

dekh 'ālam' tirā dil bhī na ulajh jaa.e kahīñ

is qadar dhyān se tū zulf-e-girah-gīr na dekh

KHwab to dekh magar KHwab ki tabir na dekh

kis tarah banti bigaDti hai ye taqdir na dekh

Dheh na jae kahin ulfat ka teri taj-mahal

is ki buniyaad ko dekh upri tamir na dekh

main ne jo kuchh bhi kiya sab teri shah pa ke kiya

hashr ke roz faqat meri hi taqsir na dekh

us ko pana hai to phir toD de sare bandhan

rah mein us ki kisi ko bhi ana-gir na dekh

tujh sa zalim bhi na kha jae taras dekh kahin

dam mein apne taDapta hua naKHchir na dekh

khinch abru ki kaman aur chala tir pe tir

kitne sinon mein hain paiwast tere tir na dekh

ek jhaTke ki to hai baat magar us ka KHayal

mujh ko roke hai ki tu jaanib-e-zanjir na dekh

dekh 'alam' tera dil bhi na ulajh jae kahin

is qadar dhyan se tu zulf-e-girah-gir na dekh