خواب تو دیکھ مگر خواب کی تعبیر نہ دیکھ

خواب تو دیکھ مگر خواب کی تعبیر نہ دیکھ

کس طرح بنتی بگڑتی ہے یہ تقدیر نہ دیکھ

ڈھ نہ جائے کہیں الفت کا تری تاج محل

اس کی بنیاد کو دیکھ اوپری تعمیر نہ دیکھ

میں نے جو کچھ بھی کیا سب تری شہہ پا کے کیا

حشر کے روز فقط میری ہی تقصیر نہ دیکھ

اس کو پانا ہے تو پھر توڑ دے سارے بندھن

راہ میں اس کی کسی کو بھی عنا گیر نہ دیکھ

تجھ سا ظالم بھی نہ کھا جائے ترس دیکھ کہیں

دام میں اپنے تڑپتا ہوا نخچیر نہ دیکھ

کھینچ ابرو کی کماں اور چلا تیر پہ تیر

کتنے سینوں میں ہیں پیوست ترے تیر نہ دیکھ

ایک جھٹکے کی تو ہے بات مگر اس کا خیال

مجھ کو روکے ہے کہ تو جانب زنجیر نہ دیکھ

دیکھ عالمؔ ترا دل بھی نہ الجھ جائے کہیں

اس قدر دھیان سے تو زلف گرہ گیر نہ دیکھ