KHwabon ka nashsha hai na tamanna ka silsila

ḳhvāboñ kā nashsha hai na tamannā kā silsila

ab rah gayā hai bas ġham-e-duniyā kā silsila

ābād duur duur haiñ vīrāñ se kuchh maqām

ye bastiyāñ haiñ yā koī sahrā kā silsila

gardish meñ jān-o-dil hoñ to kyūñkar mile sukūñ

yaaro nahīñ ye sāġhar-o-mīnā kā silsila

do hī qadam chale the kisī kī talāsh meñ

phir mil sakā na naqsh-e-kaf-e-pā kā silsila

insāñ ko silsiloñ se milegī najāt kyā

duniyā ke ba.ad hai abhī uqbā kā silsila

apne vajūd se bhī gile par huā tamām

itnā baḌhā shikāyat-e-bejā kā silsila

ik shahr-e-tishna-kām meñ jiite haiñ yuuñ 'sahar'

aatā hai roz ḳhvāb meñ dariyā kā silsila

KHwabon ka nashsha hai na tamanna ka silsila

ab rah gaya hai bas gham-e-duniya ka silsila

aabaad dur dur hain viran se kuchh maqam

ye bastiyan hain ya koi sahra ka silsila

gardish mein jaan-o-dil hon to kyunkar mile sukun

yaro nahin ye saghar-o-mina ka silsila

do hi qadam chale the kisi ki talash mein

phir mil saka na naqsh-e-kaf-e-pa ka silsila

insan ko silsilon se milegi najat kya

duniya ke baad hai abhi uqba ka silsila

apne wajud se bhi gile par hua tamam

itna baDha shikayat-e-beja ka silsila

ek shahr-e-tishna-kaam mein jite hain yun 'sahar'

aata hai roz KHwab mein dariya ka silsila