KHwabon ke sath zehn ki angDaiyan bhi hain

ḳhvāboñ ke saath zehn kī añgḌā.iyāñ bhī haiñ

ik raushnī bhī hai ka.ī parchhā.iyāñ bhī haiñ

ye kā.enāt ḳhud bhī hai ik paikar-e-jamīl

aur kuchh tire jamāl kī ra.anā.iyāñ bhī haiñ

Duubā huā huuñ qulzum-e-ālām meñ magar

zer-e-qadam hayāt kī parchhā.iyāñ bhī haiñ

jaadū jagātī raat ke sāyoñ ke ās-pās

larzāñ tumhārī yaad kī pahnā.iyāñ bhī haiñ

aatā nahīñ shabāb yūñhī kā.enāt par

masrūf kār-e-ishq kī barnā.iyāñ bhī haiñ

shām-e-balā na mujh se churā is tarah nigāh

tanhā nahīñ huuñ maiñ mirī tanhā.iyāñ bhī haiñ

haiñ terī anjuman meñ hameñ ik fasurda-dil

lekin hamīñ se anjuman-ārā.iyāñ bhī haiñ

'hurmat' faqat bulandī-e-ehsās hī nahīñ

merī talab meñ ruuh kī gahrā.iyāñ bhī haiñ

KHwabon ke sath zehn ki angDaiyan bhi hain

ek raushni bhi hai kai parchhaiyan bhi hain

ye kaenat KHud bhi hai ek paikar-e-jamil

aur kuchh tere jamal ki ranaiyan bhi hain

Duba hua hun qulzum-e-alam mein magar

zer-e-qadam hayat ki parchhaiyan bhi hain

jadu jagati raat ke sayon ke aas-pas

larzan tumhaari yaad ki pahnaiyan bhi hain

aata nahin shabab yunhi kaenat par

masruf kar-e-ishq ki barnaiyan bhi hain

sham-e-bala na mujh se chura is tarah nigah

tanha nahin hun main meri tanhaiyan bhi hain

hain teri anjuman mein hamein ek fasurda-dil

lekin hamin se anjuman-araiyan bhi hain

'hurmat' faqat bulandi-e-ehsas hi nahin

meri talab mein ruh ki gahraiyan bhi hain