KHwabon ki chhanw mein jo tha apna aashiyana

ḳhvāboñ kī chhāñv meñ jo thā apnā āshiyāna

sūraj jalā chukā hai ḳhvāboñ kā shāmiyāna

phailāo jo thā us kā asrār āsmāñ tak

simTā kahīñ kahīñ par ban rāz-e-dā.imāna

uḌtī huī nazar ko zulmat ne aa ke bhedā

be-chūk kis qadar thā sayyād kā nishāna

in talḳh haqīqatoñ se nā-āgahī hai behtar

mad.hoshiyoñ meñ jiinā be-ḳhud-o-be-Thikāna

yuuñ talḳhiyoñ pe āḳhir ab aañkh jo khulī hai

ḳhvāboñ kī shīrnī bas jiine kā hai bahāna

be-ḳhvāb merī āñkheñ vo chiiz DhūñDhtī haiñ

jis ke tilism meñ ho ḳhvāboñ kā āshiyāna

kab tak bachā.e rakheñ dāman ko paak 'yūsuf'

sastī sharāb bahut hai sarmast hai zamāna

KHwabon ki chhanw mein jo tha apna aashiyana

suraj jala chuka hai KHwabon ka shamiyana

phailao jo tha us ka asrar aasman tak

simTa kahin kahin par ban raaz-e-daimana

uDti hui nazar ko zulmat ne aa ke bheda

be-chuk kis qadar tha sayyaad ka nishana

in talKH haqiqaton se na-agahi hai behtar

madhoshiyon mein jina be-KHud-o-be-Thikana

yun talKHiyon pe aaKHir ab aankh jo khuli hai

KHwabon ki shirni bas jine ka hai bahana

be-KHwab meri aankhen wo chiz DhunDhti hain

jis ke tilism mein ho KHwabon ka aashiyana

kab tak bachae rakhen daman ko pak 'yusuf'

sasti sharab bahut hai sarmast hai zamana