KHwabon ki ek bhiD lagi hai jism bechaara nind mein hai

ḳhvāboñ kī ik bhiiḌ lagī hai jism bechārā niiñd meñ hai

aadhā chehra niiñd se bāhar aadhā chehra niiñd meñ hai

ik ijlās thā dīvānoñ kā jis kī ye rūdād banī!

sadiyoñ se bīmār hai duniyā aur masīhā niiñd meñ hai

āhan-paikar āvāzoñ par ham ne jinheñ tasḳhīr kiyā

sote sote chauñk uThte haiñ aisā dhaḌkā niiñd meñ hai

haft-aflāk ne dastak de kar pūchhā thā kis haal meñ ho

ik darvesh ne baḌh ke sadā dī ye sayyāra niiñd meñ hai

pal bhar meñ sho.ala bhaḌkegā shahr khañDar ho jā.eñge

jaltī sham.eñ haath meñ le kar rūh-e-zamāna niiñd meñ hai

jaag rahī hai rūh-e-āhan ḳhvāb meñ hai insāñ kā zamīr

bedārī kī sau lahreñ haiñ phir bhī ye duniyā niiñd meñ hai

uTThegā aur lamha-bhar meñ hashr bapā ho jā.egā

har lamha aisā lagtā hai koī fitna niiñd meñ hai

shahr-panāh kī dīvāroñ par ik duzdāna aahaT hai

aur maiñ us ko dekh rahā huuñ shahr to saarā niiñd meñ hai

KHwabon ki ek bhiD lagi hai jism bechaara nind mein hai

aadha chehra nind se bahar aadha chehra nind mein hai

ek ijlas tha diwanon ka jis ki ye rudad bani!

sadiyon se bimar hai duniya aur masiha nind mein hai

aahan-paikar aawazon par hum ne jinhen tasKHir kiya

sote sote chaunk uThte hain aisa dhaDka nind mein hai

haft-aflak ne dastak de kar puchha tha kis haal mein ho

ek darwesh ne baDh ke sada di ye sayyara nind mein hai

pal bhar mein shoala bhaDkega shahr khanDar ho jaenge

jalti shamen hath mein le kar ruh-e-zamana nind mein hai

jag rahi hai ruh-e-ahan KHwab mein hai insan ka zamir

bedari ki sau lahren hain phir bhi ye duniya nind mein hai

uTThega aur lamha-bhar mein hashr bapa ho jaega

har lamha aisa lagta hai koi fitna nind mein hai

shahr-panah ki diwaron par ek duzdana aahaT hai

aur main us ko dekh raha hun shahr to sara nind mein hai