KHwabon ki tarah goya bikhar jaenge hum bhi

ḳhvāboñ kī tarah goyā bikhar jā.eñge ham bhī

chup-chāp kisī roz guzar jā.eñge ham bhī

ham jaise ka.ī log chale jaate haiñ har roz

kyā hogā kisī roz jo mar jā.eñge ham bhī

ham log nahīñ kuchh bhī magar lauh-e-zamā. par

ik naqsh koī apnā sā dhar jā.eñge ham bhī

oḌhe hue haiñ ruuh pe ham dāġhoñ bharī ḳhaak

jab utregī ye ḳhaak nikhar jā.eñge ham bhī

ik aa.ina aisā ki jo bātin bhī dikhā de

aa.egā muqābil to sañvar jā.eñge ham bhī

rahnā hai kise ḳhvāb sī duniyā meñ hamesha

'kāshif' kisī din lauT ke ghar jā.eñge ham bhī

KHwabon ki tarah goya bikhar jaenge hum bhi

chup-chap kisi roz guzar jaenge hum bhi

hum jaise kai log chale jate hain har roz

kya hoga kisi roz jo mar jaenge hum bhi

hum log nahin kuchh bhi magar lauh-e-zama par

ek naqsh koi apna sa dhar jaenge hum bhi

oDhe hue hain ruh pe hum daghon bhari KHak

jab utregi ye KHak nikhar jaenge hum bhi

ek aaina aisa ki jo baatin bhi dikha de

aaega muqabil to sanwar jaenge hum bhi

rahna hai kise KHwab si duniya mein hamesha

'kashif' kisi din lauT ke ghar jaenge hum bhi