KHwabon ki tilsmati guphaon se nikal ke

ḳhvāboñ kī tilsmātī guphāoñ se nikal ke

dekho kabhī vīrāna-e-jāñ aañkh ko mal ke

har lamha hai ik ā.ina-e-umr-e-guzishta

peshānī-e-imroz pe bhī zaḳhm haiñ kal ke

tai ho na sakā marhala-e-dasht-e-tamannā

dīvār banī paañv kī zanjīr pighal ke

ik roz to ye dil kī taḌap lab pe bhī aa.e

ik roz to ye sāġhar-e-labrez bhī chhalke

dekhā jo kabhī dil ke darīche meñ simaT kar

sadiyāñ mileñ simTī huī āġhosh meñ pal ke

haijān se haiñ gūñjī huī dhyān kī galiyāñ

dil meñ utar aa.e haiñ nigāhoñ ke dhundalke

'ḳhāvar' abhī kuchh yaad kī sham.eñ haiñ farozāñ

raushan haiñ dar-o-bām abhī merī ġhazal ke

KHwabon ki tilsmati guphaon se nikal ke

dekho kabhi virana-e-jaan aankh ko mal ke

har lamha hai ek aaina-e-umr-e-guzishta

peshani-e-imroz pe bhi zaKHm hain kal ke

tai ho na saka marhala-e-dasht-e-tamanna

diwar bani panw ki zanjir pighal ke

ek roz to ye dil ki taDap lab pe bhi aae

ek roz to ye saghar-e-labrez bhi chhalke

dekha jo kabhi dil ke dariche mein simaT kar

sadiyan milen simTi hui aaghosh mein pal ke

haijaan se hain gunji hui dhyan ki galiyan

dil mein utar aae hain nigahon ke dhundalke

'KHawar' abhi kuchh yaad ki shamen hain farozan

raushan hain dar-o-baam abhi meri ghazal ke