خوابوں سے خفا رہتی ہے تعبیر ہماری

خوابوں سے خفا رہتی ہے تعبیر ہماری

لے آئی کہاں ہم کو یہ تقدیر ہماری

آباد خرابے سے ہی ہم اہل جنوں ہیں

تخریب میں پوشیدہ ہے تعمیر ہماری

رکھا ہے اسے سینۂ صد چاک میں اک عمر

ٹوٹی نہ کبھی ٹیس کی زنجیر ہماری

اے کاش کہ وہ آئیں کبھی بزم سخن میں

ہو ہجر کے عنوان پہ تقریر ہماری

دیکھو نہ حقارت سے ہم آشفتہ سروں کو

کہتے ہیں جسے عشق ہے جاگیر ہماری

ظالم نے بدل ڈالا ہے انداز ستم اب

پہناتا ہے ہم کو ہی وہ زنجیر ہماری