KHwabon se KHafa rahti hai tabir hamari

ḳhvāboñ se ḳhafā rahtī hai tā'bīr hamārī

le aa.ī kahāñ ham ko ye taqdīr hamārī

ābād ḳharābe se hī ham ahl-e-junūñ haiñ

taḳhrīb meñ poshīda hai tā'mīr hamārī

rakkhā hai use sīna-e-sad-chāk meñ ik 'umr

TuuTī na kabhī Tiis kī zanjīr hamārī

ai kaash ki vo aa.eñ kabhī bazm-e-suḳhan meñ

ho hijr ke 'unvān pe taqrīr hamārī

dekho na haqārat se ham āshufta-saroñ ko

kahte haiñ jise 'ishq hai jāgīr hamārī

zālim ne badal Daalā hai andāz-e-sitam ab

pahnātā hai ham ko hī vo zanjīr hamārī

KHwabon se KHafa rahti hai ta'bir hamari

le aai kahan hum ko ye taqdir hamari

aabaad KHarabe se hi hum ahl-e-junun hain

taKHrib mein poshida hai ta'mir hamari

rakkha hai use sina-e-sad-chaak mein ek 'umr

TuTi na kabhi Tis ki zanjir hamari

ai kash ki wo aaen kabhi bazm-e-suKHan mein

ho hijr ke 'unwan pe taqrir hamari

dekho na haqarat se hum aashufta-saron ko

kahte hain jise 'ishq hai jagir hamari

zalim ne badal Dala hai andaz-e-sitam ab

pahnata hai hum ko hi wo zanjir hamari