KHwahish-e-sharbat-e-didar karun ya na na karun

ḳhvāhish-e-sharbat-e-dīdār karūñ yā na na karūñ

maiñ ilāj-e-dil-e-bīmār karūñ yā na karūñ

talab-e-vasl pe isrār karūñ yā na karūñ

bose le kar use bezār karūñ yā na karūñ

naale shab ko pas-e-dīvār karūñ yā na karūñ

ḳhvāb se yaar ko bedār karūñ yā na karūñ

mujh se kahte haiñ batāo to mire sar kī qasam

murġh-e-dil ko maiñ giraftār karūñ yā na karūñ

yā ilāhī mujhe is meñ hai taraddud kal se

dil ye maiñ pesh-kash-e-yār karūñ yā na karūñ

chhīn kar dil mire pahlū se na le jaa.e kahīñ

tark maiñ ulfat-e-dildār karūñ yā na karūñ

yā-ilāhī kahīñ asrār na hoveñ is meñ

tā.ir-e-dil maiñ giraftār karūñ yā na karūñ

saḳht mushkil mujhe darpesh huī hai kal se

aaj ishq-e-but-e-pindār karūñ yā na karūñ

nīche talvār ke sābit-qadamī mushkil hai

sar ke dene kā maiñ iqrār karūñ yā na karūñ

ḳhauf mujh ko hai ki nāzuk hai tabī.at un kī

bose lene pe maiñ isrār karūñ yā na karūñ

paar dil kī na kahīñ tīr-e-nazar ho jaa.e

āñkheñ us shoḳh se maiñ chaar karūñ yā na karūñ

ātish-e-hijr se dil merā jalāyā tum ne

muñh se maiñ āh-e-sharar-bār karūñ yā na karūñ

mere dil se hai ye ik rashk-e-zuleḳhā kā savāl

misl yūsuf ke tujhe pyaar karūñ yā na karūñ

va.ada-e-vasl jo us se ba-qasam letā huuñ

dil se kahte haiñ maiñ iqrār karūñ yā na karūñ

aap kī raa.e hai kyā hazrat-e-mūsā is meñ

tuur par ḳhvāhish-e-dīdār karūñ yā na karūñ

qabr meñ shāna hilā kar vo mirā kahte haiñ

ḳhvāb-e-ġhaflat se maiñ bedār karūñ yā na karūñ

bevafā ek talab kartā hai mujh se 'fāḳhir'

dil ke dene meñ maiñ inkār karūñ yā na karūñ

KHwahish-e-sharbat-e-didar karun ya na na karun

main ilaj-e-dil-e-bimar karun ya na karun

talab-e-wasl pe israr karun ya na karun

bose le kar use bezar karun ya na karun

nale shab ko pas-e-diwar karun ya na karun

KHwab se yar ko bedar karun ya na karun

mujh se kahte hain batao to mere sar ki qasam

murgh-e-dil ko main giraftar karun ya na karun

ya ilahi mujhe is mein hai taraddud kal se

dil ye main pesh-kash-e-yar karun ya na karun

chhin kar dil mere pahlu se na le jae kahin

tark main ulfat-e-dildar karun ya na karun

ya-ilahi kahin asrar na howen is mein

tair-e-dil main giraftar karun ya na karun

saKHt mushkil mujhe darpesh hui hai kal se

aaj ishq-e-but-e-pindar karun ya na karun

niche talwar ke sabit-qadami mushkil hai

sar ke dene ka main iqrar karun ya na karun

KHauf mujh ko hai ki nazuk hai tabiat un ki

bose lene pe main israr karun ya na karun

par dil ki na kahin tir-e-nazar ho jae

aankhen us shoKH se main chaar karun ya na karun

aatish-e-hijr se dil mera jalaya tum ne

munh se main aah-e-sharar-bar karun ya na karun

mere dil se hai ye ek rashk-e-zuleKHa ka sawal

misl yusuf ke tujhe pyar karun ya na karun

wada-e-wasl jo us se ba-qasam leta hun

dil se kahte hain main iqrar karun ya na karun

aap ki rae hai kya hazrat-e-musa is mein

tur par KHwahish-e-didar karun ya na karun

qabr mein shana hila kar wo mera kahte hain

KHwab-e-ghaflat se main bedar karun ya na karun

bewafa ek talab karta hai mujh se 'faKHir'

dil ke dene mein main inkar karun ya na karun