KHwahish-e-wasl ke zindan mein rakkha hua hai

ḳhvāhish-e-vasl ke zindān meñ rakkhā huā hai

ḳhud ko ik shaḳhs ke imkān meñ rakkhā huā hai

hausla paḌtā nahīñ kaise uThā.ūñ us ko

hijr kā dukh bhī to sāmān meñ rakkhā huā hai

dekhne vaale bhī hairān hue jaate haiñ

dil ne har zaḳhm namakdān meñ rakkhā huā hai

titliyāñ phuul samajhte hue aa jaatī haiñ

us kī tasvīr ko gul-dān meñ rakkhā huā hai

ik paristān meñ Thahrāyā hai us ishq ne aur

dūsre shaḳhs ko multān meñ rakkhā huā hai

āte-jāte hue dil us ke tasavvur meñ rahe

hijr is vāste dālān meñ rakkhā huā hai

aur to kuchh bhī nahīñ is meñ fazīlat aisī

ik tajassus hai jo insān meñ rakkhā huā hai

dil kī taskīn ko ye baat bhī kyā kam hai 'ayāz'

us ne kuchh roz tujhe dhyān meñ rakkhā huā hai

KHwahish-e-wasl ke zindan mein rakkha hua hai

KHud ko ek shaKHs ke imkan mein rakkha hua hai

hausla paDta nahin kaise uThaun us ko

hijr ka dukh bhi to saman mein rakkha hua hai

dekhne wale bhi hairan hue jate hain

dil ne har zaKHm namakdan mein rakkha hua hai

titliyan phul samajhte hue aa jati hain

us ki taswir ko gul-dan mein rakkha hua hai

ek paristan mein Thahraya hai us ishq ne aur

dusre shaKHs ko multan mein rakkha hua hai

aate-jate hue dil us ke tasawwur mein rahe

hijr is waste dalan mein rakkha hua hai

aur to kuchh bhi nahin is mein fazilat aisi

ek tajassus hai jo insan mein rakkha hua hai

dil ki taskin ko ye baat bhi kya kam hai 'ayaz'

us ne kuchh roz tujhe dhyan mein rakkha hua hai