KHwahishen hain bahut aarzuen bahut sochti hun ki tum bin ye ghar kya karun

ḳhvāhisheñ haiñ bahut ārzūeñ bahut sochtī huuñ ki tum bin ye ghar kyā karūñ

raah chalte hue thak ga.e haiñ qadam ḳhatm hotā nahīñ ye safar kyā karūñ

koī sūraj mire saath chaltā nahīñ koī saaya bhī mujh se ulajhtā nahīñ

chāñd bhī ab nikaltā nahīñ hai yahāñ suunā suunā hai dil kā nagar kyā karūñ

maiñ tirā dukh banūñ maiñ tirā ġham banūñ raas aa jaa.e tujh ko vo mausam banūñ

koī tadbīr ab kaam aatī nahīñ aur dil par tire maiñ asar kyā karūñ

hai chakā-chauñd shohrat kī ye raushnī tū nahīñ hai to kuchh bhī nahīñ zindagī

rāste mere pairoñ meñ sone ke haiñ aur chāñdī kī hai rahguzar kyā karūñ

dard dil meñ rakhūñ bhī to kab tak nihāñ dukh maiñ apnā karūñ bhī to kis par ayaañ

zaḳhm detī haiñ mujh ko ye tanhā.iyāñ mujh ko takte haiñ dīvār-o-dar kyā karūñ

sāmne hai nazar ke khulā āsmāñ maiñ qafas se nikal kar bhī jā.ūñ kahāñ

aa bhī jā.ūñ maiñ uḌ kar tire paas bhī par mire kaT ga.e haiñ magar kyā karūñ

maiñ 'surūr' us kī ḳhātir karūñ bhī to kyā mujh se rūThā huā hai masīhā mirā

har shifā har davā merī be-faiz hai har duā ho ga.ī be-asar kyā karūñ

KHwahishen hain bahut aarzuen bahut sochti hun ki tum bin ye ghar kya karun

rah chalte hue thak gae hain qadam KHatm hota nahin ye safar kya karun

koi suraj mere sath chalta nahin koi saya bhi mujh se ulajhta nahin

chand bhi ab nikalta nahin hai yahan suna suna hai dil ka nagar kya karun

main tera dukh banun main tera gham banun ras aa jae tujh ko wo mausam banun

koi tadbir ab kaam aati nahin aur dil par tere main asar kya karun

hai chaka-chaund shohrat ki ye raushni tu nahin hai to kuchh bhi nahin zindagi

raste mere pairon mein sone ke hain aur chandi ki hai rahguzar kya karun

dard dil mein rakhun bhi to kab tak nihan dukh main apna karun bhi to kis par ayan

zaKHm deti hain mujh ko ye tanhaiyan mujh ko takte hain diwar-o-dar kya karun

samne hai nazar ke khula aasman main qafas se nikal kar bhi jaun kahan

aa bhi jaun main uD kar tere pas bhi par mere kaT gae hain magar kya karun

main 'surur' us ki KHatir karun bhi to kya mujh se ruTha hua hai masiha mera

har shifa har dawa meri be-faiz hai har dua ho gai be-asar kya karun