ki jaise koi musafir watan mein lauT aae

ki jaise koī musāfir vatan meñ lauT aa.e

huī jo shaam to phir se thakan meñ lauT aa.e

na ābshār na sahrā lagā sake qīmat

ham apnī pyaas ko le kar dahan meñ lauT aa.e

safar tavīl bahut thā kisī kī āñkhoñ tak

to us ke baad ham apne badan meñ lauT aa.e

kabhī ga.e the havāoñ kā sāmnā karne

sabhī charāġh usī anjuman meñ lauT aa.e

kisī tarah to fazāoñ kī ḳhāmushī TuuTe

to phir se shor-e-salāsil chalan meñ lauT aa.e

'amīr' imaam batāo ye mājrā kyā hai

tumhāre sher usī bāñkpan meñ lauT aa.e

ki jaise koi musafir watan mein lauT aae

hui jo sham to phir se thakan mein lauT aae

na aabshaar na sahra laga sake qimat

hum apni pyas ko le kar dahan mein lauT aae

safar tawil bahut tha kisi ki aankhon tak

to us ke baad hum apne badan mein lauT aae

kabhi gae the hawaon ka samna karne

sabhi charagh usi anjuman mein lauT aae

kisi tarah to fazaon ki KHamushi TuTe

to phir se shor-e-salasil chalan mein lauT aae

'amir' imam batao ye majra kya hai

tumhaare sher usi bankpan mein lauT aae