kidhar rawan hai mera karwan nahin malum

kidhar ravāñ hai mirā kārvāñ nahīñ ma.alūm

nasīb le ke chalā hai kahāñ nahīñ ma.alūm

hamārā ḳhirman-e-dil bhī to jal chukā yārab

giregī ab kahāñ barq-e-tapāñ nahīñ ma.alūm

bas ik nigāh-e-mohabbat se un ko dekhā thā

haiñ mujh se kis liye vo bad-gumāñ nahīñ ma.alūm

bane haiñ aaj vahī muntazim gulistāñ ke

ki jin ko farq-e-bahār-o-ḳhizāñ nahīñ ma.alūm

adū thī barq na dushman thā bāġhbāñ apnā

jalāyā kis ne mirā āshiyāñ nahīñ ma.alūm

bahār mujh se hai maiñ pāsbān-e-gulshan huuñ

mirā maqām tujhe bāġhbāñ nahīñ ma.alūm

dil-e-'umīd' bhī thā jis ke saath saath ravāñ

kahāñ pe luT gayā vo kārvāñ nahīñ ma.alūm

kidhar rawan hai mera karwan nahin malum

nasib le ke chala hai kahan nahin malum

hamara KHirman-e-dil bhi to jal chuka yarab

giregi ab kahan barq-e-tapan nahin malum

bas ek nigah-e-mohabbat se un ko dekha tha

hain mujh se kis liye wo bad-guman nahin malum

bane hain aaj wahi muntazim gulistan ke

ki jin ko farq-e-bahaar-o-KHizan nahin malum

adu thi barq na dushman tha baghban apna

jalaya kis ne mera aashiyan nahin malum

bahaar mujh se hai main pasban-e-gulshan hun

mera maqam tujhe baghban nahin malum

dil-e-'umid' bhi tha jis ke sath sath rawan

kahan pe luT gaya wo karwan nahin malum