ki bahut koshishen magar na hui

kī bahut koshisheñ magar na huī

bin tire zindagī basar na huī

vo ye bole ki jaan do apnī

aur ham se agar magar na huī

jo tire hijr meñ milī ham ko

bas usī raat kī sahar na huī

jab in āñkhoñ ke ashk suukh ga.e

tab se bārish kabhī idhar na huī

muntazir ham usī karam ke the

par 'ināyat kī ik nazar na huī

gum the vo kis ḳhayāl meñ ki unheñ

mere jaane kī bhī ḳhabar na huī

raat din tum ne jis ko māñgā thā

vo hī hāsil tumheñ 'asar' na huī

ki bahut koshishen magar na hui

bin tere zindagi basar na hui

wo ye bole ki jaan do apni

aur hum se agar magar na hui

jo tere hijr mein mili hum ko

bas usi raat ki sahar na hui

jab in aankhon ke ashk sukh gae

tab se barish kabhi idhar na hui

muntazir hum usi karam ke the

par 'inayat ki ek nazar na hui

gum the wo kis KHayal mein ki unhen

mere jaane ki bhi KHabar na hui

raat din tum ne jis ko manga tha

wo hi hasil tumhein 'asar' na hui