کی محبت بھی تو مروت میں

کی محبت بھی تو مروت میں

یہ خباثت تھی اپنی خصلت میں

کیسے ممکن ہے دل کو بھائے بس

ایک ہی شخص اتنی خلقت میں

میں کہوں تو مرا مکان نہ لے

دم گھٹے گا یہاں کی وحشت میں

اس کی محفل میں دل پڑا ہوگا

آ گیا تھا میں اٹھ کے عجلت میں

یاد کرتا ہوں تجھ کو فرصت سے

کام کرتا ہوں باقی فرصت میں

غم کا موجب نہیں ہے کوئی بھی

یہ تو داخل ہے اپنی فطرت میں

اپنا ہونا تو اک شرارت ہے

کون شامل تھا اس شرارت میں

عشق کا کاروبار کون کرے

بس خسارہ ہے اس تجارت میں