ki talab ek shah ne kuchh pand az-hakim-e-nukta-dan

kī talab ik shah ne kuchh pand az-hakīm-e-nukta-dāñ

us ne sun ke yuuñ kahā ai sāhib-e-iqbāl-o-shāñ

yaad rakh aur paas rakh aur saḳht rakh aur jam.a kar

khā chhupā, kaaT aur uThā, de le, ba-ḳhūbī har zamāñ

us ne is mujmal ke tafsīlāt jab pūchhe to phir

lutf se us nukta-ras ne yuuñ kiyā is kā bayāñ

yaad rakh har dam ḳhudā ko paas rakh husn-e-vafā

saḳht rakh diiñ ko mudām aur jam.a kar ilm ai javāñ

khā ġhazab-ġhussa chhupā aib-e-rafīq-o-āshnā

kaaT rabt-e-ham-nashīn-e-bad ki hai is meñ ziyāñ

aur uThā har dam za.īf-o-nā-tavāñ se zulm-o-jaur

daad mazlūmoñ kī de aur le bahisht-e-jāvedāñ

nasr meñ mujh ko 'nazīr' aa.e the ye nukte nazar

maiñ ne nazm in ko kiyā to dil ho har dam shādmāñ

ki talab ek shah ne kuchh pand az-hakim-e-nukta-dan

us ne sun ke yun kaha ai sahib-e-iqbaal-o-shan

yaad rakh aur pas rakh aur saKHt rakh aur jama kar

kha chhupa, kaT aur uTha, de le, ba-KHubi har zaman

us ne is mujmal ke tafsilat jab puchhe to phir

lutf se us nukta-ras ne yun kiya is ka bayan

yaad rakh har dam KHuda ko pas rakh husn-e-wafa

saKHt rakh din ko mudam aur jama kar ilm ai jawan

kha ghazab-ghussa chhupa aib-e-rafiq-o-ashna

kaT rabt-e-ham-nashin-e-bad ki hai is mein ziyan

aur uTha har dam zaif-o-na-tawan se zulm-o-jaur

dad mazlumon ki de aur le bahisht-e-jawedan

nasr mein mujh ko 'nazir' aae the ye nukte nazar

main ne nazm in ko kiya to dil ho har dam shadman