kin bastiyon ke yaro hum KHwab dekhte hain

kin bastiyoñ ke yaaro ham ḳhvāb dekhte haiñ

jañgal pahāḌ dariyā tālāb dekhte haiñ

begānī lag rahīñ haiñ mausam kī bārisheñ bhī

mahtāb sūratoñ ko be-āb dekhte haiñ

sach mai meñ jhuuT paanī itnā milā diyā hai

ab jis ko dekhte haiñ sairāb dekhte haiñ

ik zulf ke bhañvar se jaise nikal ke aa.e

ik jism kī nadī meñ girdāb dekhte haiñ

kal jis jagah paḌā thā paanī kā kaal ham par

aaj us jagah lahū kā sailāb dekhte haiñ

ai be-hunar sambhal kar chalnā hai shā.irī meñ

sher-o-suḳhan ke māhir ahbāb dekhte haiñ

kin bastiyon ke yaro hum KHwab dekhte hain

jangal pahaD dariya talab dekhte hain

begani lag rahin hain mausam ki barishen bhi

mahtab suraton ko be-ab dekhte hain

sach mai mein jhuT pani itna mila diya hai

ab jis ko dekhte hain sairab dekhte hain

ek zulf ke bhanwar se jaise nikal ke aae

ek jism ki nadi mein girdab dekhte hain

kal jis jagah paDa tha pani ka kal hum par

aaj us jagah lahu ka sailab dekhte hain

ai be-hunar sambhal kar chalna hai shairi mein

sher-o-suKHan ke mahir ahbab dekhte hain