kin lafzon mein itni kaDwi itni kasili baat likhun

kin lafzoñ meñ itnī kaḌvī itnī kasīlī baat likhūñ

sher kī maiñ tahzīb banā huuñ yā apne hālāt likhūñ

ġham nahīñ likkhūñ kyā maiñ ġham ko jashn likhūñ kyā mātam ko

jo dekhe haiñ maiñ ne janāze kyā un ko bārāt likhūñ

kaise likhūñ maiñ chāñd ke qisse kaise likhūñ maiñ phuul kī baat

ret uḌaa.e garm havā to kaise maiñ barsāt likhūñ

kis kis kī āñkhoñ meñ dekhe maiñ ne zahr bujhe ḳhanjar

ḳhud se bhī jo maiñ ne chhupā.e kaise vo sadmāt likhūñ

taḳht kī ḳhvāhish luuT kī lālach kamzoroñ par zulm kā shauq

lekin un kā farmānā hai maiñ in ko jazbāt likhūñ

qātil bhī maqtūl bhī donoñ naam ḳhudā kā lete the

koī ḳhudā hai to vo kahāñ thā merī kyā auqāt likhūñ

apnī apnī tārīkī ko log ujālā kahte haiñ

tārīkī ke naam likhūñ to qaumeñ firqe zaat likhūñ

jaane ye kaisā daur hai jis meñ jur.at bhī to mushkil hai

din ho agar to us ko likhūñ din raat agar ho raat likhūñ

kin lafzon mein itni kaDwi itni kasili baat likhun

sher ki main tahzib bana hun ya apne haalat likhun

gham nahin likkhun kya main gham ko jashn likhun kya matam ko

jo dekhe hain main ne janaze kya un ko baraat likhun

kaise likhun main chand ke qisse kaise likhun main phul ki baat

ret uDae garm hawa to kaise main barsat likhun

kis kis ki aankhon mein dekhe main ne zahr bujhe KHanjar

KHud se bhi jo main ne chhupae kaise wo sadmat likhun

taKHt ki KHwahish luT ki lalach kamzoron par zulm ka shauq

lekin un ka farmana hai main in ko jazbaat likhun

qatil bhi maqtul bhi donon nam KHuda ka lete the

koi KHuda hai to wo kahan tha meri kya auqat likhun

apni apni tariki ko log ujala kahte hain

tariki ke nam likhun to qaumen firqe zat likhun

jaane ye kaisa daur hai jis mein jurat bhi to mushkil hai

din ho agar to us ko likhun din raat agar ho raat likhun