kin uljhanon mein chhoD gai justuju mujhe

kin uljhanoñ meñ chhoḌ ga.ī justujū mujhe

maiñ aarzū ko DhūñDhtā huuñ aarzū mujhe

ummīd ne bhī haath se dāman chhuḌā liyā

kyā haal ho jo aise meñ mil jaa.e tū mujhe

maqsūd-e-dil kuchh aur hai zauq-e-nazar kuchh aur

kis kashmakash meñ Daal ga.ī aarzū mujhe

qurbān be-ḳhudī ke kiyā sab se be-niyāz

apnī talāsh hai na tirī justujū mujhe

larzāñ thī jis ḳhayāl se duniyā-e-ārzū

aalam vo aa rahā hai nazar hū-ba-hū mujhe

har ik nafas hai sāz-e-mohabbat banā huā

baḳhshī hai soz-e-ishq ne vo aabrū mujhe

ik markaz-e-jamāl hai merī nigāh-e-shauq

pahuñchā diyā hai kis ne tire rū-ba-rū mujhe

shāyad 'munīr' ishq kī takmīl ho ga.ī

bār-e-garāñ hai aaj har ik aarzū mujhe

kin uljhanon mein chhoD gai justuju mujhe

main aarzu ko DhunDhta hun aarzu mujhe

ummid ne bhi hath se daman chhuDa liya

kya haal ho jo aise mein mil jae tu mujhe

maqsud-e-dil kuchh aur hai zauq-e-nazar kuchh aur

kis kashmakash mein Dal gai aarzu mujhe

qurban be-KHudi ke kiya sab se be-niyaz

apni talash hai na teri justuju mujhe

larzan thi jis KHayal se duniya-e-arzu

aalam wo aa raha hai nazar hu-ba-hu mujhe

har ek nafas hai saz-e-mohabbat bana hua

baKHshi hai soz-e-ishq ne wo aabru mujhe

ek markaz-e-jamal hai meri nigah-e-shauq

pahuncha diya hai kis ne tere ru-ba-ru mujhe

shayad 'munir' ishq ki takmil ho gai

bar-e-garan hai aaj har ek aarzu mujhe