kinara-dar-kinara mustaqil manjdhaar hai yun bhi

kināra-dar-kināra mustaqil mañjdhār hai yuuñ bhī

mire paanī meñ jo kuchh hai vo yuuñ pur-asrār hai yuuñ bhī

bahā jaatā huuñ aksar duur lamhoñ ke hisāroñ se

mire Thahrāo ke āġhosh meñ raftār hai yuuñ bhī

kahāñ ḳhaliyoñ ke vīrānoñ meñ us ko DhūñDne jaa.eñ

zamānoñ kā sirā mere sire se paar hai yuuñ bhī

yahāñ se yuuñ bhī ik tajrīd kī sarhad ubhartī hai

aur apne darmiyāñ anfās kī dīvār hai yuuñ bhī

hamāre gumbadoñ kī guuñj kā chehrā nahīñ to kyā

jo tujh se kah nahīñ sakte pas-e-iz.hār hai yuuñ bhī

rahā kyā farq andar aur bāhar meñ 'riyāz' āḳhir

jo mujh meñ kho chukā hai mujh se vo sab paar hai yuuñ bhī

kinara-dar-kinara mustaqil manjdhaar hai yun bhi

mere pani mein jo kuchh hai wo yun pur-asrar hai yun bhi

baha jata hun aksar dur lamhon ke hisaron se

mere Thahrao ke aaghosh mein raftar hai yun bhi

kahan KHaliyon ke viranon mein us ko DhunDne jaen

zamanon ka sira mere sire se par hai yun bhi

yahan se yun bhi ek tajrid ki sarhad ubharti hai

aur apne darmiyan anfas ki diwar hai yun bhi

hamare gumbadon ki gunj ka chehra nahin to kya

jo tujh se kah nahin sakte pas-e-izhaar hai yun bhi

raha kya farq andar aur bahar mein 'riyaz' aaKHir

jo mujh mein kho chuka hai mujh se wo sab par hai yun bhi