kinayatan bhi tera nam jab suna maine

kināyatan bhī tirā naam jab sunā maiñ ne

vufūr-e-shauq meñ sar ko jhukā diyā maiñ ne

hujūm-e-ġham meñ adā-e-qalandarī na ga.ī

masarratoñ se bhī rakkhā hai fāsla maiñ ne

butoñ ne hausla-afzā.iyāñ to kiiñ merī

magar tujhī ko pukārā mire ḳhudā maiñ ne

tamām 'umr añdheroñ se merī jang rahī

bujhā charāġh to dil ko jalā liyā maiñ ne

tamām shahr ke patthar mirī taraf aa.e

ḳhirad ko jab bhī dikhāyā hai aa.ina maiñ ne

mire ḳhudā mire she'roñ ko zindagī de de

har ek she'r pe māñgī hai ye du'ā maiñ ne

kinayatan bhi tera nam jab suna main ne

wufur-e-shauq mein sar ko jhuka diya main ne

hujum-e-gham mein ada-e-qalandari na gai

masarraton se bhi rakkha hai fasla main ne

buton ne hausla-afzaiyan to kin meri

magar tujhi ko pukara mere KHuda main ne

tamam 'umr andheron se meri jang rahi

bujha charagh to dil ko jala liya main ne

tamam shahr ke patthar meri taraf aae

KHirad ko jab bhi dikhaya hai aaina main ne

mere KHuda mere she'ron ko zindagi de de

har ek she'r pe mangi hai ye du'a main ne