kirnen jagin to sabze pe jhilmil aansu bol uThe

kirneñ jāgīñ to sabze pe jhilmil aañsū bol uThe

raat ko tanhā.ī meñ shabnam chupke chupke roī hai

ik ik kar ke TuuT ga.e sab ḳhvāb na.ī sub.hoñ vaale

rote rote chashm-e-tamannā pal do pal ko soī hai

armānoñ kī nuqra.ī sāhil vīrāne se lagte haiñ

mauj-e-talātum meñ ye kis ne dil kī nayyā Duboī hai

chupke se jab aa jaate haiñ yādoñ ke ġham-ḳhvār bahut

aañsū chhalke aate haiñ tab kaisī ye dil-jūī hai

zaḳhm-e-tamannā sulgā lo aur saath mire do-gām chalo

dekh to leñ saa.e meñ khaḌā us moḌ pe jaise koī hai

dil ke āñgan meñ 'husnā' jī zaḳhm mahakte haiñ ab ke

ashkoñ kī barsāt meñ ham ne fasl anokhī boī hai

kirnen jagin to sabze pe jhilmil aansu bol uThe

raat ko tanhai mein shabnam chupke chupke roi hai

ek ek kar ke TuT gae sab KHwab nai subhon wale

rote rote chashm-e-tamanna pal do pal ko soi hai

armanon ki nuqrai sahil virane se lagte hain

mauj-e-talatum mein ye kis ne dil ki nayya Duboi hai

chupke se jab aa jate hain yaadon ke gham-KHwar bahut

aansu chhalke aate hain tab kaisi ye dil-jui hai

zaKHm-e-tamanna sulga lo aur sath mere do-gam chalo

dekh to len sae mein khaDa us moD pe jaise koi hai

dil ke aangan mein 'husna' ji zaKHm mahakte hain ab ke

ashkon ki barsat mein hum ne fasl anokhi boi hai