kis ajab saat-e-nayab mein aaya hua hun

kis ajab sā.at-e-nāyāb meñ aayā huā huuñ

tujh se milne maiñ tire ḳhvāb meñ aayā huā huuñ

phir vahī maiñ huuñ, vahī hijr kā dariyā-e-amīq

koī dam aks-e-sar-e-āb meñ aayā huā huuñ

kaise ā.īne ke mānind chamaktā huā maiñ

ishq ke shahr-e-abad-tāb meñ aayā huā huuñ

merī har taan hai az-roz-e-azal tā-ba-abad

ek sur ke liye mizrāb meñ aayā huā huuñ

koī parchhā.īñ kabhī jism se kartī hai kalām?

be-sabab sāya-e-mahtāb meñ aayā huā huuñ

har guzarte hue lamhe meñ Tapaktā huā meñ

dard huuñ, vaqt ke a.asāb meñ aayā huā huuñ

kaisī gahrā.ī se niklā huuñ adam kī 'irfān'

kaise pāyāb se tālāb meñ aayā huā huuñ

kis ajab saat-e-nayab mein aaya hua hun

tujh se milne main tere KHwab mein aaya hua hun

phir wahi main hun, wahi hijr ka dariya-e-amiq

koi dam aks-e-sar-e-ab mein aaya hua hun

kaise aaine ke manind chamakta hua main

ishq ke shahr-e-abad-tab mein aaya hua hun

meri har tan hai az-roz-e-azal ta-ba-abad

ek sur ke liye mizrab mein aaya hua hun

koi parchhain kabhi jism se karti hai kalam?

be-sabab saya-e-mahtab mein aaya hua hun

har guzarte hue lamhe mein Tapakta hua mein

dard hun, waqt ke aasab mein aaya hua hun

kaisi gahrai se nikla hun adam ki 'irfan'

kaise payab se talab mein aaya hua hun