کس بات پہ ہنستے ہیں کس بات پہ روتے ہیں

کس بات پہ ہنستے ہیں کس بات پہ روتے ہیں

ہم جیسوں کے سکھ دکھ تو کچھ اور ہی ہوتے ہیں

محنت کا صلہ اپنا فاقے میں رہا کرنا

ہم سے نہیں کٹتی ہے جس فصل کو بوتے ہیں

طوفاں سے نکلنا تو ساگر کو دکھانا تھا

کشتی کو خود اپنی ہم ساحل میں ڈبوتے ہیں

اشکوں کے برسنے سے دل صاف تو ہوتا ہے

پر اور بھی گہرا ہو جس زخم کو دھوتے ہیں

تھک جاتی ہیں یہ آنکھیں منظر کے بدلنے سے

اک خواب میں جگتے ہیں اک خواب میں سوتے ہیں

منزل نہ ہماری ہے رستہ نہ ہمارا ہے

سامان یہ کس کا ہے کس بوجھ کو ڈھوتے ہیں

جو کچھ بھی کریں ذرہؔ یہ ہاتھ نہ تھرائیں

پتھر بھی اٹھاتے ہیں موتی بھی پروتے ہیں