kis baat pe hanste hain kis baat pe rote hain

kis baat pe hañste haiñ kis baat pe rote haiñ

ham jaisoñ ke sukh-dukh to kuchh aur hī hote haiñ

mehnat kā sila apnā faaqe meñ rahā karnā

ham se nahīñ kaTtī hai jis fasl ko bote haiñ

tūfāñ se nikalnā to sāgar ko dikhānā thā

kashtī ko ḳhud apnī ham sāhil meñ Dubote haiñ

ashkoñ ke barasne se dil saaf to hotā hai

par aur bhī gahrā ho jis zaḳhm ko dhote haiñ

thak jaatī haiñ ye āñkheñ manzar ke badalne se

ik ḳhvāb meñ jagte haiñ ik ḳhvāb meñ sote haiñ

manzil na hamārī hai rasta na hamārā hai

sāmān ye kis kā hai kis bojh ko Dhote haiñ

jo kuchh bhī kareñ 'zarra' ye haath na tharrā.eñ

patthar bhī uThāte haiñ motī bhī pirote haiñ

kis baat pe hanste hain kis baat pe rote hain

hum jaison ke sukh-dukh to kuchh aur hi hote hain

mehnat ka sila apna faqe mein raha karna

hum se nahin kaTti hai jis fasl ko bote hain

tufan se nikalna to sagar ko dikhana tha

kashti ko KHud apni hum sahil mein Dubote hain

ashkon ke barasne se dil saf to hota hai

par aur bhi gahra ho jis zaKHm ko dhote hain

thak jati hain ye aankhen manzar ke badalne se

ek KHwab mein jagte hain ek KHwab mein sote hain

manzil na hamari hai rasta na hamara hai

saman ye kis ka hai kis bojh ko Dhote hain

jo kuchh bhi karen 'zarra' ye hath na tharraen

patthar bhi uThate hain moti bhi pirote hain