کس برتے پر ارمانوں کی بستی پھیلائی جاتی ہے

کس برتے پر ارمانوں کی بستی پھیلائی جاتی ہے

پھیلی ہوئی دنیا کیا جانیں کس دن منگوائی جاتی ہے

جو خون جگر میں آتا ہے بہہ جاتا ہے وہ آنکھوں سے

ہم روز کمائے جاتے ہیں اور روز کمائی جاتی ہے

برداشت کی حد سے باہر ہے ہر چند مصیبت الفت کی

ہم اس کو اٹھائے جاتے ہیں جب تک یہ اٹھائی جاتی ہے

عاشق کی طبیعت کھیل نہیں پھٹکار ہے کیا غم خواروں پر

کس کو بہلائے جاتے ہیں یہ کیا بہلائی جاتی ہے

کیا بعد فنا خوشترؔ ہے رکھا ماتم تو جیتے جی کا تھا

اب ہم اٹھوائے جاتے ہیں اب صف اٹھوائی جاتی ہے