kis chaman pe girna hai bijliyan samajhti hain

kis chaman pe girnā hai bijliyāñ samajhtī haiñ

shāḳh-e-gul kī tāqat ko āñdhiyāñ samajhtī haiñ

kaun phuul kaisā hai bāġhbān kyā jaane

phuul kī latāfat ko titliyāñ samajhtī haiñ

sirf taaza ḳhabroñ par e'timād mat karnā

kis kā bhaav kitnā hai manDiyāñ samajhtī haiñ

kaun aane vaalā hai is ġharīb-ḳhāne meñ

mere dil kī hālat ko siskiyāñ samajhtī haiñ

āj-kal ke beTe to kuchh samajh nahīñ paate

baap kī jafā-kārī beTiyāñ samajhtī haiñ

mere dil ko nisbat hai ab bhī aisī pariyoñ se

jo mirī duāoñ ko gāliyāñ samajhtī haiñ

hichkiyoñ se miltī hai yaad kī jhalak 'anjum'

nabz kī harārat ko uñgliyāñ samajhtī haiñ

kis chaman pe girna hai bijliyan samajhti hain

shaKH-e-gul ki taqat ko aandhiyan samajhti hain

kaun phul kaisa hai baghban kya jaane

phul ki latafat ko titliyan samajhti hain

sirf taza KHabron par e'timad mat karna

kis ka bhaw kitna hai manDiyan samajhti hain

kaun aane wala hai is gharib-KHane mein

mere dil ki haalat ko siskiyan samajhti hain

aaj-kal ke beTe to kuchh samajh nahin pate

bap ki jafa-kari beTiyan samajhti hain

mere dil ko nisbat hai ab bhi aisi pariyon se

jo meri duaon ko galiyan samajhti hain

hichkiyon se milti hai yaad ki jhalak 'anjum'

nabz ki hararat ko ungliyan samajhti hain