kis dhandli se subh ko kahte hain sham log

kis dhāñdlī se sub.h ko kahte haiñ shaam log

dene lage haiñ jhuuT ko sach kā maqām log

chehre kī dhuul par na paḌegī kabhī nigāh

ilzām ā.inoñ pe rakheñge tamām log

zulmat ko nuur zahr ko amrat kahā karo

kahte haiñ zindagī ke mudār-ul-mahām log

nā-ahl ko 'urūj hunar-mand ko zavāl

hairāñ haiñ dekh dekh ke ulTā nizām log

hai dīdanī ḳhayāl-o-'amal kā tazād bhī

nafrat hai dil meñ karte haiñ muñh par salām log

mehr-o-mah-o-nujūm to tasḳhīr kar liye

aur apne nafs hī ko na kar paa.e raam log

ḳhushiyoñ ke ġham meñ ashk bahāte haiñ kis liye

motī se kyoñ chukāte haiñ patthar ke daam log

'bedil' ye nek-o-bad ko to pahchānte bhī haiñ

phir jaane kyoñ burā.ī se lete haiñ kaam log

kis dhandli se subh ko kahte hain sham log

dene lage hain jhuT ko sach ka maqam log

chehre ki dhul par na paDegi kabhi nigah

ilzam aainon pe rakhenge tamam log

zulmat ko nur zahr ko amrat kaha karo

kahte hain zindagi ke mudar-ul-maham log

na-ahl ko 'uruj hunar-mand ko zawal

hairan hain dekh dekh ke ulTa nizam log

hai didani KHayal-o-'amal ka tazad bhi

nafrat hai dil mein karte hain munh par salam log

mehr-o-mah-o-nujum to tasKHir kar liye

aur apne nafs hi ko na kar pae ram log

KHushiyon ke gham mein ashk bahate hain kis liye

moti se kyon chukate hain patthar ke dam log

'bedil' ye nek-o-bad ko to pahchante bhi hain

phir jaane kyon burai se lete hain kaam log