kis dil se tark-e-lazzat-e-duniya kare koi

kis dil se tark-e-lazzat-e-duniyā kare koī

vo ḳhvāb-e-dil-fareb ki dekhā kare koī

kyā sahl hai ki tark-e-tamāshā kare koī

dil se na ho to aañkh se tauba kare koī

ġhunche ke dil meñ kuchh na thā ik aah ke sivā

phir kyā shaguftagī kī tamannā kare koī

āñkheñ hoñ jis ke āñkhoñ hī āñkhoñ meñ taaḌ le

dard apnā vo nahīñ ki TaTolā kare koī

dil muztarib nigāh giraftār-e-shash-jahat

farmā.iye kidhar kā irāda kare koī

yādash ba-ḳhair yād-e-ḳhudā aa hī jaatī hai

apnī taraf se laakh bhulāyā kare koī

is kī nigāh-e-shauq ke qurbān jā.iye

tujh aise be-nishāñ ko jo paidā kare koī

taa.at ho yā gunāh pas-e-parda ḳhuub hai

donoñ kā jab maza hai ki tanhā kare koī

bande na hoñge jitne ḳhudā haiñ ḳhudā.ī meñ

kis kis ḳhudā ke sāmne sajda kare koī

husn-e-'yagānā' aap hī apnā hijāb hai

husn-e-hijāb duur se dekhā kare koī

kis dil se tark-e-lazzat-e-duniya kare koi

wo KHwab-e-dil-fareb ki dekha kare koi

kya sahl hai ki tark-e-tamasha kare koi

dil se na ho to aankh se tauba kare koi

ghunche ke dil mein kuchh na tha ek aah ke siwa

phir kya shaguftagi ki tamanna kare koi

aankhen hon jis ke aankhon hi aankhon mein taD le

dard apna wo nahin ki TaTola kare koi

dil muztarib nigah giraftar-e-shash-jahat

farmaiye kidhar ka irada kare koi

yaadash ba-KHair yaad-e-KHuda aa hi jati hai

apni taraf se lakh bhulaya kare koi

is ki nigah-e-shauq ke qurban jaiye

tujh aise be-nishan ko jo paida kare koi

taat ho ya gunah pas-e-parda KHub hai

donon ka jab maza hai ki tanha kare koi

bande na honge jitne KHuda hain KHudai mein

kis kis KHuda ke samne sajda kare koi

husn-e-'yagana' aap hi apna hijab hai

husn-e-hijab dur se dekha kare koi