کس گھر میں کس حجاب میں اے جاں نہاں ہو تم

کس گھر میں کس حجاب میں اے جاں نہاں ہو تم

ہم راہ دیکھتے ہیں تمہاری کہاں ہو تم

مٹنے پر اپنے ناز نہ ہو کس طرح مجھے

میں ہوں وہ بے نشان کہ جس کے نشاں ہو تم

پردہ دری کا آپ نہ کیجے گلہ اگر

ہم سینہ چاک‌ کر کے دکھا دیں جہاں ہو تم

دونوں جگہ ظہور برابر ہے آپ کا

ذرے میں آفتاب میں یکساں عیاں ہو تم

خالی نہیں ہے آپ کے جلوے سے کوئی شے

دریا ہو اور قطروں کے اندر نہاں ہو تم

حاضر ہے بزم یار میں سامان عیش سب

اب کس کا انتظار ہے اکبرؔ کہاں ہو تم